Baat-cheet

Main: Aaj in hawaaon se keh do, ke mujhme na umang hai, na chaahat, aur keh do ke inhe aaj mere bina hi udna hoga.
Ud sakein mere bagair, toh ud lein!
Ek arsay se yeh khayaal nahi aaya mann main, aur shaayad ab jab aa gaya hai to kucch dair ho chuki hai, par maloom padta hai ke in hawaaon ko apne aap hi udaan bharne ki himmat, aur kaabiliyat pehle hi de deni chahiye thi. Har samay meri ungli pakadkar buland aakash main kautuhal karte bhi hain, toh kya khaas karte hain? Aatmvishwaas ka beej na toh kabhi boya gaya, aur na us haseen drakht ke phalne phoolne ki naubat aayi. Vaise toh isme koi shaq nahi ke aam taur par mera sahaara barqaraar rahega. Par jab, jaise aaj, apne mann ke vash main aakar main kucch dheela pad jaaoon, toh kya udna chhod dengi yeh? Nahi. Akele baadalon main lot-pot hone ka bhi apna hi ras hai.
Toh aaj, main nahi aa sakta. Jaayiye! Main bhi dekhoon kis mukaam tak tum pahunchoge? Or kis mukaam se bas ek tinke ki doorie par, haar maan kar gir padoge door us nirdayi zameen ki or. Yaad rakhna, jab giroge toh main tumhe pakadne ke liye maujood na hounga. Toh jab udo, toh is vishwaas se ke apne bal par utar sakoge, aur jab thakaan badan ko jakad le, aur tum saahas ko thukra do, toh ye yaad rakhna ke antheen chhalaang ke us paar ek gehri khaai hai jisme girne ka nirnay tumhaara apna tha.

 

Hawa: Toh tey raha. Na toh aap aayenge, aur na hum ruk sakenge. Us anant neele samudra main tairne ka humein shauk nahi hai, humein zaroorat hai. Aur jab tak pancheeyon ki raftaar ko pachhaad kar hum apne hi pravaah main kho naa jaayein tab tak jee maanta bhi toh nahi! Maaf kijiye, par girne ka darr itna bhi zyaada nahi hai, ke hum jeena hi tyaag dein! Agar gir gaye, toh khushi se girenge, ke kam se kam kaali gehraaiyon main girne se pehle, humne chaahe aasmaan ki chhat ko na sahi, par kisi oonchaayi ko chooma toh sahi! Aur jab giray tab aankhon main usi un-chhooyi seema ki abhilasha hogi, jiski ummeed se hum aaj apse kayee zyaada jeevit hain.
Toh jaayiye! Na sahaare ki aavashyakta hai, na chetaavni ki. Jab tak us neeli chaadar se thoda rang apne maathe par laga na lein, tab tak koshishein jaari rahengi. Khushi se.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s